فضفضة عن الحرب الدائرة في طرابلس

Tripoli_War

في خضّم الأيامات والظروف السيئة اللي نمروا بيها هاليومين، يقعد السؤال اللي يسأل عليه الجميع ويقعدوا يتعاركوا هو من السبب؟
يا ترى السبب هو قوات عملية الكرامة؟ وإلا القوات التابعه لحكومة الوفاق؟ والا القوات اللي كانت تابعه لفجر ليبيا وحكومة الإنقاذ وتوا تقاتل مع حكومة الوفاق؟ وإلا القذافي ونظامه بفتحه مخازن السلاح وتحديه بالحرب بدل التهدئة؟

الحقيقة يا جماعه كل من سبق ذكرهم هما جزء من الغلط، ولو كنا في يوم نبوا نولوا دولة ليها القيمة لازم نفهموا الحقيقة هاذي، كل الأطراف هي سبب في اللي صاير، وما فيش توا قدامهم وقدامنا إلا حل من إثنين:

الأول: هو أننا نستمروا في هالحرب وينتصر أحد الأطراف، ولكن مش حتكون هذه هي النهاية السعيدة، بالعكس بعدها حتستمر الحروب إلى مالا نهاية، والكلام هذا ما نقولش فيه لأني نشوف في الغيب، ولكن ببساطة لأننا شفنا وقت كل ما يسيطر طرف تستمر المعارك ونرجعوا للمربع الأول.

الثاني: هو أنه يقرر الجميع أنه خلاص مافيش حرب، الكل غلط وأوغل في الغلط، ولازم كل الناس تسامح بعضها في اللي بإستطاعتهم، واللي فوق استطاعتهم أنهم يسامحوا، يأخذوا حقهم، لكن بطريقة صحيحة وعبر أطراف ثالثة محايدة.

ممكن تشوف أنه كلامي سخيف وما فيش حد بيسمعه نهائيًا، لأنه في النهاية كل طرف خلاص عقد العزم على المضي قدمًا، ولكن أنا شخصيًا هذا اللي نتمناه، ونحاول نشاركه بالك يريحني، وممكن حتى شخص واحد يشوفه ويقرر يسيب السلاح.

#طرابلس_عروس_البحر
#طرابلس_عاصمة_السلام 
#أنا_مدني_أنا_ضد_الحرب

وأخيراً، مدونتي الشخصية ترحّب بالعالم!

لقد هرمنا من أجل هذه اللحظة التاريخية!!

خمس سنوات من التفكير المتقطع، عشرات المرات من تثبيت WordPress على الخادم المحلي وتثبيت أحد القوالب وتعديله وينتهي الأمر بالفتور أو عدم الرضا وحذفي لكل شئ، غير تجريب البرمجيات الأخرى مثل Ghost، والمنصات مثل منشر، وأُكتب، وغيرها، وكل ما يصل هذا المشروع لذُروته، بدأت أسأل نفسي أسئلة أخرى كماذا سأكتب، ولمن سأكتب، وهل الأمر يحتاج مدونة في عصر الشبكات الإجتماعية، خاصة وأنه في بلدي معظم الناس لايفرقون بين الإنترنت والفيس بوك أصلا!

استكمل القراءة “وأخيراً، مدونتي الشخصية ترحّب بالعالم!”